كامل الاوصاف فتنى
كتبهاelashref ، في 12 مايو 2008 الساعة: 13:18 م
بعد السلام والفاتحه
والصلاه على رسوله
هقول عليك كلام
محدش يقدر يقوله
اصله طالع من قلبى
ومافيش غيرك هتنوله
عمال اجمعه واكتبه
وسهران له الليل بطوله
قبل مااشوفك واعرفك
كانت حياتى كلها فاضيه
زى ملاكم واخد بوكس
ومنتظريين الضربه القاضيه
عمره ما فكر فى المستقبل
ولا مهتم بحياته الماضيه
زى ناس كتير شقيانه
ساكه على همها وراضيه
لكن لما جيتى قصادى
كأنك مدفع وصابنى بشظيه
نقول كمان
يعنى بالمفيد والمختصر
ان لقانا ده كان قدر
مش هقولك ياليل ياعين
ولا بسهرلك ويا القمر
ومش هقول ورد الجنانين
ولا خدودك وقت السحر
كلامى عبيط لكن حويط
وهيفهمه كل البشر
بالمفيد والمختصر
ايامى قبلك كيس دقيق
وقع على الارض واتبدر
ايامى قبلك زى الشاى
طقت كوبايته وراح هدر
يعنى كنت عود قصب
دخل معصرته وانعصر
يعنى زى قلم جاف
صاحبه رماه لما انكسر
واادى المفيد والمختصر
كانت حياتى قبلك عوجه
وعينى مكنش فيها نظر
نقول كمان
اعذرينى يانور عينى
مش قادر اوصف احساسى
لما قلبى حس بقلبك
لقيت مقاسه على مقاسى
جيتى سكنتى ارضى الناشفه
وحطيتك تاج فوق راسى
وخضرتى ارضى وبساتينى
وكنت انت قدومى وفاسى
وحاربت بيك اعدائى
وكنت انت سلاحى ومتراسى
ولما احكيلك كل مشاكلى
بتحليها وما بتحتاسى
وعلمتينى فروض دينى
وبيك خزيت عين الخناس
والله لأشيلك فى عيونى
وعمرك ابدا ما هتنداسى
نقول كمان
شفت عيونك طيبه
ودايما منى قريبه
ولما درست اخلاقك
لقيتك بنت مؤدبه
ولما عرفت اوصافك
مافيك حاجه متعيبه
منمنه ومسمسمه
وناعمه كالغوريبه
لقيت نفسى بحبك كده
ولاكنش قصدى ولا مترتبه
اصل اللى زيك لازم تنحب
والاعشتنا تبقى مهببه
ياطيبه
نقول كمان
قربت منك ولقيت فيك
الصحبه واللمه والعيال
شفت ف عينك ضى النور
واحلى كلام ممكن ينقال
لمحت وشك لقيته بدر
وعودك حلو كعود غزلان
لوقلت ف وصفك ياحبيبه
ماهيكفينى مليون موال
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
مايو 12th, 2008 at 12 مايو 2008 11:28 م
كامل الاوصاف فتني قصيدة بالعامية المصرية رائعة للغاية
قريبة من القلب اوصافها تنصهر في كلمات فتفتننا بما تحوي
من صفات جميلة تقترب الى المثالية والكمال وتبقى هذه رؤية الشاعر العاشق
الذي استحق وبجدارة هذا القلب وهذه الصورة
أحمد الأشرف / كنت متألق وهكذ انت دائماً